کراچی میں پی ایس ایل کا پہلا میچ، سٹیڈیم میں تماشائی نہ ہونے کے برابر

پہلے ہی میچ میں کراچی کنگ کی ناقص کارکردگی نے بھی شائقین کو مایوس کیا

کراچی:پی ایس ایل نائن کے پہلے میچ میں تماشائیوں نے کرکٹ کا بائیکاٹ کردیا ہے۔ سٹیڈیم میں تماشائی نہ ہونے کے برابر تھے۔ میچ میں شائقین کرکٹ کی عدم دلچسپی اور عدم شرکت کی وجہ سے میدان بھی سونا سونا رہا۔بدھ کے روز نیشنل سٹیڈیم کراچی میں کراچی گنگز اور اسلام آباد یونائیٹد کے درمیان میچ ہوا۔یہ رواں سال کے پی ایس ایل کا کراچی میں پہلا میچ تھا جس سے شائقین بڑی حد تک لاتعلق رہے اور گرانڈ کا رخ نہیں کیا۔ اس میچ میں کراچی کو ہوم گرانڈ پر شکست بھی ہوگئی جس نے آئے ہوئے تھوڑے بہت تماشائیوں کو مایوس کیا۔ اسلام آباد نے سات وکٹوں سے میدان مار لیا۔
بدھ کے میچ کے دوران کراچی کے نیشنل سٹیڈیم کے بیشتر حصے میں کرسیاں خالی رہیں اور دوران میچ چھکے اور چوکے لگنے پر روایتی شور شرابا بھی دیکھنے میں نہیں آیا۔کراچی سے تعلق رکھنے والے سینیئر سپورٹس جرنلسٹ جاوید اقبال کا کہنا ہے کہ کراچی کنگز اور اسلام آباد یونائیٹڈ کی ٹیموں میں کئی اہم ملکی اور غیر ملکی کھلاڑی شامل ہیں۔ان کھلاڑیوں کو ایکشن میں دیکھنے کے لیے ماضی میں پی ایس ایل میچز کے ٹکٹ چند گھنٹوں میں فروخت ہوئے تھے۔ لیکن اس بار کراچی میں پی ایس ایل کے میچز میدان میں دیکھنے والوں کی تعداد بہت ہی کم ہے۔جاوید اقبال کا کہنا تھا کہ شہر کے مختلف مقامات پر ٹکٹ فروخت کے لیے انتظامیہ کی جانب سے بورڈز بھی لگائے گئے ہیں لیکن تماشائی پھر بھی نیشنل سٹیڈیم کا رخ نہیں کیے۔
نیشنل سٹیڈیم کراچی میں 28 فروری تا 18 مارچ پی ایس ایل سیزن 9 کے کل 11 میچز کھیلے جائیں گے۔