پاکستانیوں کیلئے بڑی خوشخبری، الیکٹرک گاڑی اب قسطوں پر بھی دستیاب

GiGi اب پچاس فیصد ایڈوانس کے ساتھ 12 اقساط میں بھی صارفین کو دستیاب ہوگی

اسلام آباد:پاکستانیوں کے لئے ایک بڑی خوشخبری اس وقت سامنے آئی جب معروف الیکٹرک کار بنانے والی کمپنی جیجی (GiGi)نے پاکستان میں قسطوں میں گاڑی کی فروخت اعلان کیا ہے۔ ماہرین نے اس اقدام کی ایک وجہ پٹرول کی بڑھتی قیمتوں، مارکیٹ کا مقابلہ اور شہریوں کی گاڑی کے حوالے سے کم ہوتی قوت خرید کو بھی قراردیا ہے۔
یاد رہے کہ پاکستان میں حالیہ مہنگائی کی لہر نے شہریوں کی قوت خرید پر گہرا اثر ڈالا ہے اور حالات کو دیکھتے ہوئے کار ساز کمپنیاں شہریوں کو آسان اقساط پر گاڑی حاصل کرنے کی سہولت دینے پر اتر آئیں ہیں ۔
خبر آئی ہے کہ الیکٹرک کار بنانے والی کمپنی گگو نے اپنی ہیچ بیک منی الیکٹرک کار جیجی (GiGi)کی قسطوں پر فروخت کا اعلان کیا ہے۔ چھوٹی الیکٹرک گاڑیوں کے شوقین افراد کے لیے یہ معیاری الیکٹرک کار خریدنے کا سنہری موقع ہے۔
گگو موٹرز کی جانب سے اعلان کیا گیا ہے کہ ہچ بیک جیجی(GiGi) منی الیکٹرک کار کسٹمرز کے لیے آسان اقساط میں دستیاب ہوگی۔ کمپنی کی جانب سے پیش کردہ آفر کے مطابق، قسطوں پر گاڑی حاصل کرنے کے لیے 19 لاکھ 50 ہزار روپے کی 50 فیصد ڈائون پیمنٹ کرنا ضروری ہے۔
جیجی ہیچ بیک الیکٹرک کار کی بقیہ ادائیگی 12 آسان اقساط میں کی جاسکتی ہے جبکہ اس گاڑی کی ماہانہ قسط ایک لاکھ 62 ہزار روپے مقرر کی گئی ہے۔
یاد رہے کہ گگو موٹرز نے رواں برس مئی میں جیجی ہیچ بیک منی الیکٹرک کار کی قیمت میں نمایاں کمی کا اعلان کیا تھا۔ کمپنی کے ایک ذمے دار کے مطابق جیجی ای وی کی نئی نظر ثانی شدہ قیمت 39 لاکھ روپے مقرر کی گئی تھی۔ اس گاڑی کی پرانی قیمت ساڑھے 46 لاکھ روپے تھی۔ اس طرح اس گاڑی کی قیمت میں ساڑھے 7 لاکھ روپے کی نمایاں کمی کی گئی تھی۔
توقع کی جارہی ہے کہ فیول کاخرچہ بچانے والی اس کار کو لوگ اس کی خوبصورتی اور مضبوطی و پائیداری کی بنیاد پر بھی اسکی خرید کو ترجیح دیں گے۔
۔۔۔۔۔۔۔۔۔۔۔