سائنس اینڈ ٹیکنالوجی کے وفاقی وزیر فواد چودھری زرتاج گل کی بہن کی حمایت میں سامنے آگئے

اسلام آباد(نیوزرپورٹر) سائنس اینڈ ٹیکنالوجی کے وفاقی وزیر فواد چودھری وزیر مملکت برائے ماحولیاتی تبدیلی زرتاج گل وزیر کی بہن شبنم گل کی حمایت میں سامنے آگئے۔ گزشتہ روز جاری ہونے والے اپنے ایک ٹویٹر پیغام میں انہوں نے کہا کہ شبنم گل نے دہشت گردی اورفاٹا پر پی ایچ ڈی کررکھا ہے اور انھیں انٹرویوزکے بعد منتخب کیا گیا۔کسی بھی بے بنیاد خبرکوآگے شیئر کرنے سے پہلے اسکی حقیقت کو چیک کرنا انتہائی ضرری ہے۔یادر ہے کہ حال ہی میں ڈائریکٹر نیکٹا تعینات ہونے والی شبنم گل وزیر مملکت ماحولیاتی تبدیلی زرتاج گل وزیرکی ہمشیرہ ہیں۔ شبنم گل گریڈ18کی اسسٹنٹ پروفیسر ہیں اور یونیورسٹی نے انہیں اعزازی گریڈ19دے رکھا ہے، تاہم انہیں ایک ہی لمحے اسسٹنٹ پروفسر سے انسداد دہشتگردی کے قومی ادارے میں ڈائریکٹر تعینات کردیاگیا، ان کی تعیناتی 3سال کیلیے ہوگی جس کا نوٹیفیکیشن بھی جاری کر دیا گیا ہے۔ذرائع کا کہنا ہے کہ شبنم گل نے 2010ء میں پولیٹیکل سائنس میں پی ایچ ڈی میں داخلہ لیا تھا مگر 9سال گزرنے کے باوجود پی ایچ ڈی مکمل نہیں کر سکی ہیں۔ان کی تعیناتی میں ان کی بہن زرتاج گل کا کردار سامنے آیا ہے جس کے بعد سے ان کی تعیناتی پر اعتراضات اٹھ رہے ہیں۔