ایبٹ آباد پولیس نے شادی شدہ جوڑے کو غیرت کے نام پر قتل کرنے والے تین ملزمان کو گرفتار کرلیا

پشاور: ایبٹ آباد پولیس نے شادی شدہ جوڑے کو غیرت کے نام پر قتل کرنے والے پانچ میں سے تین ملزمان کو گرفتار کرلیا، ملزمان میں لڑکی کے والدین بھی شامل ہیں۔ صوبہ خیبرپختونخوا کے شہر ایبٹ آباد میں چند روز قبل غیرت کے نام پر لڑکا لڑکی کو قتل کردیا گیا تھا،پولیس کے مطابق مقتولین کی شناخت صبا اور راشد کے نام سے ہوئی تھی۔ایبٹ آباد کی تحصیل حویلیاں کے گائوں برج میں فائرنگ سے قتل ہونے والے شادی شدہ جوڑے نے چند روز قبل پسند کی شادی کی تھی واردات کے بعد ملزمان فرار ہوگئے تھے۔پولیس کا کہنا ہے کہ جہانگیر نامی شخص مقتولہ کا بھائی ہے، ملزم نے وقعے والے روز گھر میں گھس کر فائرنگ کی اور اپنی بہن اور اس کے شوہر کو قتل کرکے فرار ہوگیا۔پولیس نے والدین سمیت پانچ افراد کے خلاف مقدمہ درج کرکے تین ملزمان کو گرفتار کرلیا، مزید ملزمان کی تلاش میں چھاپے مارے جارہے ہیں۔