مسلم لیگ (ن)نے حکومت کے خلاف اپوزیشن کی دیگر جماعتوں کے ساتھ مل کر احتجاج کرنے کا اشارہ دے دیا،

لا ہو ر: پا کستان مسلم لیگ (ن)نے حکومت کے خلاف اپوزیشن کی دیگر جماعتوں کے ساتھ مل کر احتجاج کرنے کا اشارہ دے دیا، اس حکومت کے خلاف اپوزیشن کو مل کر احتجاج کرنا پڑا تو کریں گے، جس کا لائحہ عمل رمضان المبارک کے بعد ترتیب دیا جائے گا، رمضان کے بعد ہم اس حکومت کے خلاف باہر نکلیں گے۔جمعرات کو کوٹ لکھپت جیل کے باہر میڈیا سے گفتگو کرتے ہوئے رانا مشہود کا کہنا تھا کہ مہنگائی اس قدر بڑھ چکی ہے کہ بچہ بچہ پریشان ہے،نون لیگ عوام کو مزید مشکل میں نہیں دیکھ سکتی۔انہوں نے کہا کہ شہباز شریف نے کل خود بتایا ہے ان کا علاج جاری ہے،ان کے چند ٹیسٹ رہ گئے ہیں، وہ بجٹ سے پہلے یہاں ہوں گے اور اس حکومت کے کالے کارناموں کو ایکسپوز کریں گے۔رانا مشہود نے مزید کہا کہ حکومت بدنیتی کی وجہ سے نوازشریف کا علاج نہیں کروا رہی، عمران خان کی سیاست نواز شریف کے نام سے شروع ہوتی ہے اور اسی پر ختم ہوتی ہے، پاکستان کو آئی ایم ایف کے حوالے کر دیا گیا ہے، حکومت اس ملک سے سرمایہ کاروں کو بھگا رہی ہے۔