رشکئی سپیشل اکنامک زون کی ترقی سے مقامی افراد کے لئے روزگار کے مواقع پیدا ہوں گے، سی ای او خیبر پختونخوا بورڈ آف انویسٹمنٹ اینڈ ٹریڈ

اسلام آباد :خیبر پختونخوا بورڈ آف انویسٹمنٹ اینڈ ٹریڈ (کے پی۔ بی او آئی ٹی) کے سی ای اوحسن داؤد نے کہا ہے کہ سی پیک کے تحت رشکئی سپیشل اکنامک زون (ایس ای زیڈ) کی ترقی سے خیبر پختونخوا کی سماجی و اقتصادی ترقی میں کردار ادا کرنے کے لئے مقامی افراد کے لئے روزگار کے مواقع پیدا ہوں گے۔ پیر کو  حسن داؤد نے کہاکہ یہ پہلا خصوصی اقتصادی زون ہے جو پبلک پرائیویٹ پارٹنرشپ میں قائم کیا جا رہا ہے۔ پاک افغان طورخم بارڈر سے قریب ہونے کی وجہ سے اس سپیشل اکنامک زون کے اندر تیار ہونے والی اشیا آسانی سے افغانستان برآمد کی جاسکتی ہیں۔ رشکئی خصوصی اقتصادی زون ملک میں بلاواسطہ بیرونی سرمایہ کاری لانے کے لئے کلیدی کردار ادا کرے گا۔ انہوں نے کہا کہ خصوصی اقتصادی زون کو پورے علاقے میں وسائل اور صنعتی پیداوار کے حوالے سے نمایاں حیثیت حاصل ہے۔ اس کے علاوہ سی پیک راہداری کے پہلے سنگم پر واقع ہونے اور پشاور کے ہوائی اڈے اور ایم ایل ون کے قریب ہونے کی وجہ سے اسے منفرد مقام حاصل ہے۔ انہوں نے کہا کہ یہ زون ایک ہزار ایکڑ اراضی پر مشتمل ہے جو 12 کروڑ 80 لاکھ ڈالر کی لاگت سے تین مراحل میں تعمیر ہو گا۔ انہوں نے کہا کہ یہ زون پشاور طورخم موٹر وے اور ایم ایل ون کی تعمیر کے بعد پاکستان افغانستان اور وسطی ایشیائی ریاستوں کے لئے برآمدات کے مرکز کے طورپر سہولت فراہم کرے گا۔