3 روزہ ورکشاپ چھ تکنیکی حصوں پر مشتمل ہے، ہر حصے میں لیکچرز اور بعد میں سوال و جواب کا سیشن ہوگا
اسلام آباد: کامسٹیک کی تین روزہ بین الاقوامی ورکشاپ برائے تیاری ادویات کا آغاز 20 مئی کو کامسٹیک سیکرٹریٹ میں ہوا۔کامسٹیک کے ممتاز سکالر، ڈاکٹر محمد حفیظ الرحمن، پروفیسر اور چیئرمین، شعبہ بائیو کیمسٹری اور مالیکیولر بیالوجی، ڈھاکہ انٹرنیشنل یونیورسٹی، ڈھاکہ، بنگلہ دیش یہ ورکشاپ کر رہے ہیں۔ ڈاکٹر رحمان نے اپنے تعارفی خطاب میں کہا کہ ادویات زیادہ تر مغربی دنیا میں تیار کی جاتی ہیں۔ انہوں نے بتایا کہ ادویات زیادہ تر مقامی ضروریات کو پورا کرنے کے لیے تیار کی جاتی ہیں۔ انہوں نے او آئی سی کے رکن ممالک کے لیے مقامی طور پر ادویات تیار کرنے کی ضرورت پر زور دیا۔ پروفیسر رحمان نے کہا کہ ادویات کی تیاری ایک کثیر الجہتی کوشش ہے جس کے لیے سائنسدانوں اور صنعت کے مابین اشتراک اور تعاون کی ضرورت ہے۔ انہوں نے امید ظاہر کی کہ یہ ورکشاپ مقامی ادویات کی ترقی کے لیے اہم کردار ادا کرے گی۔ انہوں نے اس سمت میں کامسٹیک کی کوششوں کو سراہا۔
یہ 3 روزہ ورکشاپ چھ تکنیکی حصوں پر مشتمل ہے، ہر حصے میں لیکچرز اور بعد میں سوال و جواب کا وقت شامل ہے۔ ادویات کی تحقیق کی اہمیت، حکمت عملی ، اخلاقیات ، کلینیکل ٹرائلز، بائیوٹیکنالوجی اور ادویات کی دریافت، دوائیوں کی تیاری کے لیے جانوروں کے مناسب نمونوں کی تیاری، اور ڈیٹا کا تجزیہ اور تشریح اس ورکشاپ کے تکنیکی سیشنز میں زیرِ بحث آنے والے چیدہ چیدہ موضوعات ہیں۔
پروفیسر ڈاکٹر حفیظ الرحمن کی جامعہ کراچی ، کامسٹیک اورآئی سی سی بی ایس کے ساتھ طویل وابستگی ہے۔ بنگلہ دیش انسٹی ٹیوٹ آف ریسرچ اینڈ ری ہیبلیٹیشن ان ذیابیطس، اینڈوکرائن اینڈ میٹابولک ڈس آرڈرز اور آئی سی سی بی ایس کے درمیان تعاون کے ذریعے، انہوں نے پی سی ایم ڈی (پنجوانی سنٹر فار مالیکیولر میڈیسن اینڈ ڈرگ ریسرچ) میں ایک "مالیکیولر ڈائبیٹولوجی لیبارٹری” قائم کی ہے۔ انہوں نے پاکستان میں پہلی بار پی سی ایم ڈی میں چوہوں کے آئیلیٹس آئسولیشن سیٹ اپ بھی قائم کیا، اور کئی نئے انسولین سیکریٹاگوگس کی نشاندہی کی اور ان کے طریقہ کار کو دریافت کیا۔ اس وقت ڈاکٹر حفیظ الرحمن ڈھاکہ انٹرنیشنل یونیورسٹی، بنگلہ دیش میں بطور پروفیسر کام کر رہے ہیں۔ بین الاقوامی جرائد میں ان کی 60 سے زیادہ اشاعتیں ہیں۔ انہوں نے پی ایچ ڈی پروگرام کے لیے جاپان سے میکسٹ فیلوشپ بھی حاصل کی اور انہیں کئی تحقیقی گرانٹس بھی دی گئی ہیں۔ حال ہی میں، ڈاکٹر حافظ کو "کامستیک ممتاز محقق” کا خطاب دیا گیا ہے۔
ورکشاپ میں او آئی سی کے رکن ممالک کے قومی اور بین الاقوامی سکالرز ذاتی طور پر اور آن لائن شرکت کر رہے ہیں۔
