آخر موت ہے ، بھارتی کھرب پتی رتن ٹاٹا بھی چل بسے

عمر 86 برس تھی ٹاٹا گروپ کے چئیرمین تھے، بریج کینڈی ہسپتال میں انتقال ہوا
ماں باپ کی علیحدگی کے بعد انہیں دادی نے پالا تھا، شادی بھی نہیں کی
انتقال کی وجہ بڑھتی عمر کے عوارض تھے،پیر کو معمول کے چیک اپ کیلئے ہسپتال داخل ہوئے لیکن پھر واپس نہ جاسکے

ممبئی :بھارت کے معروف کھرب پتی صنعتکار رتن نول ٹاٹا چل بسے ان کی عمر 86 برس تھی،آئی اے این ایس) امارات ٹاٹا سنس (ایمیریٹرس ٹاٹا سنس) کے چیرمین رتن نول ٹاٹا کا انتقال عمر سے متعلق عوارض کی وجہ سے بریج کینڈی ہاسپٹل میںہوا۔ انہیں پیر کے روز ہاسپٹل میں داخل کرایا گیا تھا، جس کے بعد کارپوریٹ، سیاسی اور عام حلقوں میں ان کی صحت کے بارے میں قیاس آرائیاں شروع ہوگئی تھیں۔ بعد ازاں انہوں نے ایک بیان جاری کیا تھا کہ عمر سے متعلق عوارض کے معمول کے طبی معائنوں کے لئے وہ ہاسپٹل میں شریک ہیں۔ بعد ازاں انہیں معاون حیات آلات پر رکھا گیا تھا حالانکہ ٹاٹا گروپ کے عہدیداران نے اس کی تردید یا توثیق نہیں کی تھی۔
ٹاٹا سنس کے موجودہ چیرمین این چندرشیکھرن نے کہا کہ ہم نقصان کے گہرے احساس کے ساتھ رتن نول ٹاٹا کو الوداع کہتے ہیں۔وہ ایک غیر معمولی لیڈر تھے، جن کے بے شمار کارنامے نہ صرف ٹاٹا گروپس کی صورت گری کی بلکہ ہمارے ملک کے تانے بانے کی بھی صورت گری۔ پورے ٹاٹا خاندان کی جانب سے میں ان کے عزیز و اقارب سے دلی اظہار تعزیت کرتا ہوں۔ ان کی وراثت ہمیں تحریک دیتی رہے گی اور ہم ان کے اصولوں پر قائم رہیں گے۔ واضح رہے کہ رتن ٹاٹا 1991 میں اِس کمپنی کے چیرمین بنے تھے اور انہوں نے اپنے پردادا کی جانب سے قائم کئے گئے اِس کاروبار کو 2012 تک چلایا۔
انہوں نے 1996 میں ٹیلی کمیونیکیشنس کمپنی ٹاٹا ٹیلی سرویسس قائم کی تھی اور 2004 میں آئی ٹی کمپنی ٹاٹا کنسلٹنسی سرویسس کو پبلک بنایا تھا۔ ان کی قیادت میں ٹاٹا گروپ کی آمدنی میں کئی گنا اضافہ ہوا تھا اور یہ (2011-2012) میں 100بلین ڈالر سے تجاوز کر گئی تھی۔ ریٹائرٹمنٹ کے بعد ٹاٹا کو امارات ٹاٹا سنس، ٹاٹا انڈسٹریز، ٹاٹاموٹرس، ٹاٹا اسٹیل اور ٹاٹا کیمیکلز کے صدرنشین کا اعزازی خطاب دیا گیا تھا۔
رتن ٹاٹا فی الحال ٹاٹا ٹرسٹس کے چیرمین تھے، جو صدر رتن ٹاٹاٹرسٹ اور الائیڈ ٹرسٹس اور سردورابجی ٹاٹا ٹرسٹ اور الائیڈٹرسٹ پر مشتمل تھا۔
حکومت ہند نے 2008 میں انہیں دوسرا اعلی ترین سیولین ایوارڈ پدماوبھوشن عطا کیا تھا۔ اس کے علاوہ انہیں کئی ہندوستانی اور بین الاقوامی یونیورسٹیوں سے دیگر کئی اعزاز، ایوارڈس اور اعزازی ڈاکٹریٹ حاصل ہوئی تھی۔ ان کے ارکانِ خاندان میں کئی بھائی اور بہنیں بشمول سیمون ٹاٹا، جمی ٹاٹا، نوئیل ٹاٹا، الوٹاٹا، شیریں جی جی بھوئی اور دیگر شامل ہیں۔
بھارتی میڈیا کے مطابق رتن ٹاٹا کو بلڈ پریشر میں کمی کی شکایت پر اسپتال لایا گیا تھا جہاں وہ انتہائی نگہداشت وارڈ میں تھے۔تین روز پہلے بھی رتن ٹاٹا کے انتقال کی خبر منظر عام پر آئی تھی تاہم انکے سوشل میڈیا سے اسکی تردید کرتے ہوئے کہا گیا تھا کہ وہ بالکل فٹ اور صحت مند ہیں۔
رتن ٹاٹا کے انتقال پر بھارتی وزیر اعظم نریندر مودی سمیت سیاست، صنعت اور فلمی دنیا سے تعلق رکھنے والی شخصیات نے افسوس کا اظہار کیا ہے۔
رتن ٹاٹا نے مارچ 1991 سے دسمبر 2012 تک ٹاٹا گروپ کی قیادت کی اور ٹاٹا سنز کو نئی بلندیوں تک پہنچایا، مارچ 2024 تک ٹاٹا گروپ کی مالیت 365 ارب ڈالر سے زیادہ ہے۔ٹاٹا گروپ کی ویب سائٹ کے مطابق 2023-24 میں ٹاٹا گروپ کی کمپنیوں نے مل کر 165 ارب ڈالر کی آمدنی حاصل کی۔ ٹاٹا گروپ کی 30 کمپنیوں میں مجموعی طور پر 10 لاکھ سے زیادہ افراد ملازمت کرتے ہیں۔
ٹاٹا گروپ کی مشہور کمپنیوں میں ٹاٹا اسٹیل، ٹاٹا کنسلٹنسی سروسز، ٹاٹا موٹرز، انڈین ہوٹلز، ایئر انڈیا، جیگوار لینڈ روور، ٹائٹن، انفینیٹی ریٹیل (کروما)، ٹرینٹ (ویسٹ سائیڈ، زوڈیو، زارا) شامل ہیں۔
۔۔۔۔۔۔