امریکہ میں‌داخلے پر پابندی کے حوالے سے کسی فہرست کا کوئی وجود نہیں،ترجمان

امریکی فوج کی حفاظت کے لیے اپنی جانیں خطرے میں ڈالنے والوں کو امریکا میں بسانے کے منصوبہ جاری رکھنے کا ارادہ ہے
امریکی سلامتی کے لیے جائزہ لیا جا رہا ہے کہ ویزا مسائل سے کس طرح نمٹنا ہے اور کسے امریکا میں داخلے کی اجازت دینی ہے

واشنگٹن:امریکہ کی جانب سے واضح کیا گیا ہے کہ امریکہ میں‌داخلے پر پابندی کے حوالے سے کسی فہرست کا کوئی وجود نہیں‌ہے.
امریکی محکمہ خارجہ کی ترجمان ٹیمی بروس نے اس خبر کی تردید کی ہے کہ امریکی حکومت نے امریکا میں داخلے پر پابندی عائد کرنے کے حوالےسے بعض ممالک کی کوئی فہرست تیار کی ہے۔بریفنگ کے دوران ٹیمی بروس نے کہا کہ کئی دنوں سے جس فہرست کا ذکر ہو رہا ہے، اس کا کوئی وجود نہیں ہے۔
انہوں نے مزید وضاحت دیتے ہوئے کہا کہ صدر ڈونلڈ ٹرمپ کے حکم پر امریکی سلامتی کے لیے جائزہ لیا جا رہا ہے کہ ویزا مسائل سے کس طرح نمٹنا ہے اور کسے امریکا میں داخلے کی اجازت دینی ہے۔اس جائزے کے مکمل ہونے کے بعد اس بارے میں تفصیل سے بات کی جائے گی۔
ٹیمی بروس نے اس بات کا بھی عزم ظاہر کیا کہ امریکی محکمہ خارجہ افغان باشندوں کے لیے اپنے منصوبے پر کاربند رہے گا۔جنہوں نے امریکی فوج کے لیے اپنی جانیں خطرے میں ڈالی ہیں، ان افراد کو امریکا میں بسانے کے منصوبے کو جاری رکھنے کا ارادہ ہے۔
اس سے قبل غیر ملکی میڈیا نے رپورٹ دی تھی کہ ٹرمپ انتظامیہ اپنے سابقہ دور کی طرح سفری پابندیاں عائد کرنے پر غور کر رہی ہے، جس سے متعدد ممالک کے ساتھ افغانستان اور پاکستان متاثر ہو سکتے ہیں۔