پاکستان پر 29،بھارت پر 26 یورپی یونین پر 20 چین پر 34 اور جاپان پر 24 فیصد ٹیرف عائد
آج ہماری اقتصادی آزادی کا دن ہے،ٹیرف سے حاصل رقم قرضوں کی ادائیگی کیلئے استعمال کریں گے،امریکی صدر
مختلف ممالک نے امریکا کے جوابی ٹیرف کو غیر ضروری اور خطرہ قرار دیتے ہوئے منسوخ کرنے کا مطالبہ کردیا
واشنگٹن: امریکی صدر ٹرمپ نے دنیا کو ہلا کر رکھ دیا دنیا بھر کے ممالک پر ٹیرف لگا دئے گئے جن میں غریب ممالک پربھی بھاری ٹیرف لگا ئے گئے ہیں ، پاکستان پر بھی 29 فیصد ٹیرف عائد کر دیا گیا ہے.امریکی صدر ڈونلڈ ٹرمپ نے دنیا کے مختلف ممالک پر جوابی ٹیرف عائد کرنے کا اعلان کردیا ہے. نیا ٹیرف 9 اپریل سے نافذالعمل ہوگا، تمام درآمدات پر 10 فیصد اور غیرملکی ساختہ گاڑیوں پر 25 فیصد اضافی ٹیکس عائد ہو گا، ٹرمپ نے ایگزیکٹو آرڈر پر دستخط کردیے.
امریکی صدر ٹرمپ نے وائٹ ہاؤس میں جوابی ٹیرف کے ایگزیکٹو آرڈر پر دستخط کیے اور خطاب میں کہا کہ جوابی ٹیرف کا نفاذ امریکا کیلئے اچھا ہوگا، آج کا دن امریکی تاریخ کے اہم دنوں میں سے ایک ہے۔ان کا کہنا تھاکہ آج ہماری اقتصادی آزادی کا دن ہے، ٹیرف سے حاصل رقم اپنے قرضوں کی ادائیگی کیلئے استعمال کریں گے، برسوں امریکی شہریوں کو سائیڈ لائن رکھا گیا، دوسری قومیں طاقتوربن گئیں، اب امریکا کی خوشحالی کی باری ہے اور اضافی ٹیرف عائد کرنے سے مضبوط مسابقت اور اشیاکی قیمتیں کم ہوں گی، اس رقم کواپنے ٹیکسوں کو کم کرنے کیلئے استعمال کریں گے۔ انہوں نے اعلان کیا کہ امریکا تمام درآمدات پر 10 فیصد اور غیرملکی ساختہ گاڑیوں پر 25 فیصد اضافی ٹیکس عائد کرے گا۔ان کا کہنا تھاکہ یورپی یونین پر 20 فیصد اضافی، چین پر 34 فیصد اور جاپان پر 24 فیصد ٹیرف عائد کریں گے جبکہ بھارت پر 26 فیصد اسرائیل پر 17 فیصد اور برطانیہ پر 10 فیصد ٹیرف عائد ہوگا۔امریکی صدر کا کہنا تھاکہ پاکستان ہم سے 58 فیصد ٹیرف چارج کرتا ہے، پاکستان پر 29 فیصد ٹیرف عائد کریں گے جبکہ بنگلا دیش پر 37 فیصد ٹیرف عائدہوگا۔امریکی صدر نے ترکیہ، سعودی عرب، قطر اور افغانستان پر 10، 10 فیصد ٹیرف عائد کر نے کا اعلان کیا۔
ویتنام پر 46، تائیوان پر32، جنوبی کوریا پر 25 فیصد، تھائی لینڈ پر36، سوئٹزرلینڈ پر 31، انڈونیشیا پر 32 اورملائیشیا پر 24فیصد جوابی ٹیرف عائد کیا گیا جبکہ کمبوڈیا پر 49، جنوبی افریقا پر 30، برازیل اور سنگاپورپر10،10 فیصد ٹیرف عائد ہوگا۔
دوسری جانب جن ممالک پر "جوابی” محصولات لاگو کیے جا رہے ہیں، ان میں زیادہ تر غریب اور ترقی پذیر معیشتیں شامل ہیں۔ ان میں دنیا کے غریب ترین ممالک جیسے جنوبی سوڈان، برونڈی اور وسطی افریقی جمہوریہ شامل ہیں جبکہ جنگ زدہ ملک سوڈان کو بھی اس فہرست میں شامل کیا گیا۔
وائٹ ہاؤس کی جانب سے وضاحت دی گئی ہے کہ صدر ٹرمپ کی جانب سے دکھائے گئے چارٹس میں درج اعداد و شمار میں جوابی محصولات کے ساتھ ساتھ 10 فیصد کا بنیادی ٹیرف بھی شامل ہے۔ وضاحت کے مطابق یورپ کو 10 فیصد جوابی محصولات اور 10 فیصد بنیادی ٹیرف کا سامنا کرنا پڑے گا جبکہ چین کو 24 فیصد جوابی محصولات کے علاوہ 10 فیصد کا بنیادی ٹیرف بھی ادا کرنا ہوگا۔امریکا کی جانب سے اعلان کردہ یہ ٹیرف 100 سے زائد ممالک پر لاگو ہوں گے۔
ڈیموکریٹس ارکان کی تنقید
ٹرمپ کی جانب سے ٹیرف کے اعلان پر اعلیٰ سطح کے ڈیموکریٹس ارکان نے سخت ردعمل کا اظہار کیا۔نیویارک ٹائمز کے مطابق سینیٹر ران وائیڈن نے ان ٹیرف کو تنقید کا نشانہ بناتے ہوئے کہا کہ یہ قیمتوں میں اضافہ کریں گے اور غیر یقینی صورتحال کو بڑھا دیں گے، ٹرمپ کا یہ قلیل مدتی ٹیرف منصوبہ امریکی مینوفیکچرنگ کو بحال نہیں کرے گا اور نہ ہی کام کرنے والے خاندانوں کی مدد کرے گا۔انہوں نے الزام عائد کیا کہ یہ ہر اس چیز پر ٹیکس ہے جو عام لوگ خریدتے ہیں تاکہ ٹرمپ اپنے ارب پتی دوستوں کو ٹیکس میں رعایت دے سکیں۔
دوسی طرف دنیا کے مختلف ممالک نے امریکا کے جوابی ٹیرف کو غیر ضروری اور خطرہ قرار دیتے ہوئے منسوخ کرنے کا مطالبہ کردیا۔
کئی نے ٹرمپ کے ان اقدامات کے خلاف شدید ردعمل دیا ہے کینیڈا نے امریکی ٹیرف کیخلاف جوابی اقدامات کا اعلان کیا. جبکہ چین نے امریکا سے نئے ٹیرف منسوخ کرنے کا مطالبہ کیا ہے. آسٹریلیا کے وزیراعظم نے امریکا کا جوابی ٹیرف غیرضروری قرار دیا.
اسی حوالے سے اطالوی وزیراعظم نے کہا کہ یورپی یونین پر امریکی ٹیرف غلط ہے جبکہ آئرلینڈ کے وزیراعظم کا کہنا تھا کہ یورپی یونین کو امریکی ٹیرف کا مناسب جواب دینا چاہیے۔
اس کے علاوہ چین نے امریکی ٹیرف کو عالمی اقتصادی ترقی کیلئے خطرہ قرار دیتے ہوئے امریکا سے نئے ٹیرف فوری طور پر منسوخ کرنے کا مطالبہ کردیا۔چینی وزارت تجارت نے کہا کہ نئے ٹیرف سے خود امریکی مفادات اور عالمی سپلائی چین کو نقصان پہنچے گا، امریکا تجارتی شراکت داروں کے ذریعے اختلافات کو مناسب طریقے سے حل کرے جب کہ برطانوی وزیر تجارت نے کہا کہ امریکی ٹیرف کے باوجود امریکا کے ساتھ اقتصادی معاہدے کیلئے پرعزم ہیں۔
ادھر خبرایجنسی کے مطابق برازیلین پارلیمینٹ نے ٹرمپ ٹیرف سے نمٹنے کیلئے قانون کی منظوری دے دی۔
دوسری جانب امریکی وزیرخزانہ نے دنیا کو خبردار کرتے ہوئے کہا کہ ٹیرف عائدکیے جانے کیخلاف ممالک انتقامی کارروائی سے گریزکریں۔ امریکی وزیرخزانہ نے مزید کہا کہ میرا ہر ملک کو مشورہ ہےکہ جوابی کارروائی نہ کریں کیونکہ امریکی ٹیرف کے خلاف جوابی کارروائی سےکشیدگی بڑھے گی۔
