میرے ہوٹل کی ملکیت کی تمام چیزیں منظور شدہ ہیں، ہوٹل گرانے والوںکے خلاف قانونی چارہ جوئی کروںگا،امیر مقام
اسلام آباد(نیوزرپورٹر) تحریک انصاف کی صوبائی حکومت نے سانحہ سوات کی آڑ میں دریائے سوات کے ارد گرد قائم سابق وفاقی وزیر امیر مقام اور دیگر لیگی رہنمائوںکے ہوٹل گرادئے ہیں.
وفاقی وزیر و صدر مسلم لیگ (ن) خیبرپختونخوا انجینئر امیر مقام نے سانحۂ سوات کے بعد عوام کی قانونی و ملکیتی املاک کو نشانہ بنانے پر صوبائی حکومت کی اپنی نااہلی چپھانے کیلئے انتقامی کارروائیوں پر شدید ردعمل ظاہر کیاہے.انہوں نے کہا کہ سوات میں تجاوزات کے نام پر آپریشن میں لوگوں کی قانونی اور جائز املاک کو نقصان پہنچانا قابل مذمت ہے۔ امیرمقام نے کہا صوبائی حکومت اپنی ناکامیوں کو چھپانے کے لیے ‘ٹورازم کی تباہی’ کا بحران کھڑا کر رہی ہے، جو نہایت افسوسناک اور شرمناک ہے۔ انہوںنے کہا میرے قانونی اور ملکیتی ہوٹل کی باؤنڈری وال گرانا سیاسی انتقام اور لوگوں کی اصل مسئلے سے توجہ ہٹانے کی ناکام کوشش ہے۔
امیر مقام کا کہنا تھا کہ میرے ہوٹل کی تمام قانونی دستاویزات، ملکیت ، NOC اور نقشہ متعلقہ حکام سے منظور شدہ موجود ہے، قانونی چارہ جوئی کرونگا۔ انہوں نے کہا میں حاجی جلات خان سمیت ان تمام لوگوں کیساتھ ہمدردی کا اظہار کرتا ہوں جنکے ساتھ ذیادتی اور ناانصافی ہوئی اور جن کی جائز اور قانونی املاک کو نقصان پہنچایا گیا۔
