پی ایس بی کی جانب سے کھلاڑیوں اور کوچنگ سٹاف کے لیے مجموعی طور پر 82 لاکھ روپے کی منظوری دی گئی ہے
تھائی لینڈ میں ہونے والے اس ٹورنامنٹ ٹورنامنٹ میں پاکستان ناقابلِ شکست رہا۔فائنل میںایران کو 2-3 سے شکست دی
اسلام آباد(سپورٹس رپورٹر) ایشین انڈر-16 چیمپئن شپ میں تاریخی فتح پر پاکستان سپورٹس بورڈ والی بال ٹیم کے کھلاڑیوں اور کوچنگ سٹاف کو 82لاکھ روپے کے کیش ایوارڈزدے گا۔پاکستان سپورٹس بورڈ کی جانب سے اتوار کو جاری بیان میں بتایا گیا کہ پی ایس بی کی 2024 کی تازہ ترین کیش ایوارڈ پالیسی کے مطابق، سالانہ براعظمی سطح پر ٹیم ایونٹس میں سونے کے تمغے جیتنے والے کھلاڑیوں کو انفرادی انعام کا 30 فیصد دیا جاتا ہے، جو فی کھلاڑی 6 لاکھ روپے بنتا ہے۔ 12 رکنی اسکواڈ کے لیے یہ مجموعی طور پر 72 لاکھ روپے بنتے ہیں۔اس کے علاوہ، پی ایس بی کی پالیسی کوچنگ سٹاف کے لیے ٹیم ایوارڈ کا 50 فیصد مختص کرتی ہے، جس کے تحت کوچ کو 10 لاکھ روپے دیے جائیں گے۔ یوں کھلاڑیوں اور کوچنگ سٹاف کے لیے مجموعی طور پر 82 لاکھ روپے کی منظوری دی گئی ہے۔
پاکستان نے تھائی لینڈ میں ہونے والے اس ٹورنامنٹ کے سنسنی خیز فائنل میں ایران کو 2-3 سے شکست دے کر ٹرافی اپنے نام کی، اور پورے ٹورنامنٹ میں ناقابلِ شکست رہا۔
پی ایس بی ترجمان کے مطابق یہ انعامی رقم آئندہ چند دنوں میں جاری کر دی جائے گی، جومختلف عمر کے کھلاڑیوں کی کارکردگی کو سراہنے اور مالی معاونت فراہم کرنے کی بورڈ کی پالیسی کا حصہ ہے۔ رقوم ان کھلاڑیوں اور کوچز کو دی جائیں گی جن کے نام ٹورنامنٹ کی آفیشل فہرست میں شامل ہیں اور جنہوں نے ضروری دستاویزات مکمل کر دی ہیں.
ایشین چیمپئن شپ میں تاریخی فتح پر والی بال ٹیم کےلئے کیش ایوارڈ کا اعلان
