سینیٹ.اعلیٰ عدلیہ ججز پر ریفرنس دائر کرنے کے خلاف قرارداد کثرت رائے سے منظور

اسلام آباد ۔ سینیٹ نے اعلیٰ عدلیہ کے ججز پر ریفرنس دائر کرنے کے خلاف قرارداد کی کثرت رائے سے منظوری دے دی۔ جمعہ کو ایوان بالا کے اجلاس کے دوران سینیٹ میں قائد ایوان راجہ ظفر الحق نے قرارداد پیش کی۔ قرارداد میں کہا گیا ہے کہ یہ ایوان حکومت کی طرف سے اعلیٰ عدلیہ کے ججوں کے خلاف دائر کئے جانے والے ریفرنس کو عدلیہ کی آزادی اور اعلیٰ عدلیہ کے ججز کے خلاف اقدام قرار دیتا ہے اور ججز کے ساتھ مکمل یکجہتی کا اظہار کرتا ہے۔ قرارداد میں کہا گیا ہے کہ ایوان حکومت سے مطالبہ کرتا ہے کہ اعلیٰ عدلیہ کے ججوں کے خلاف ریفرنس واپس لیا جائے۔ بعد ازاں چیئرمین نے ایوان سے قرارداد پر رائے لی جسے کثرت رائے سے منظور کرلیا گیا۔ قائد ایوان شبلی فراز نے کہا کہ کتنی بدقسمتی ہے کہ آج اس ایوان کو راجواڑہ بنا دیا گیا ہے اور ہمارے ارکان کو اس پر بات کرنے کی اجازت بھی نہیں دی گئی۔ اس موقع پر حکومتی ارکان چیئرمین کے ڈائس کے سامنے اکٹھے ہو گئے اور انہوں نے قرارداد کی منظوری کے معاملہ پر احتجاج کیا اور کہا کہ انہیں قرارداد پر بات کرنے کا موقع نہ دے کر زیادتی کی گئی ہے۔ چیئرمین نے کہا کہ اگر وہ سمجھتے ہیں کہ یہ قرارداد صحیح طریقے سے منظور نہیں ہوئی تو وہ اس کو مسترد کرنے کے لئے اپنی قرارداد لے آئیں۔