برطانوی سکھ بزنس مینوں اور پیٹر وردی فاؤنڈیشن کی جانب سے پاکستان میں اپنے مذہبی مقامات کو ڈویلپ کرنے کیلئے 5 سو ملین پاؤنڈ کاعطیہ

برطانیہ کے سکھ بزنس مینوں اور پیٹر وردی فاؤنڈیشن نے پاکستان میں اپنے مذہبی مقامات کو ڈویلپ کرنے کیلئے 5 سو ملین پاؤنڈ عطیہ کرنے کا اعلان کیا ہے۔ لندن سے آمدہ اطلاعات کے مطابق یہ اعلان مختلف بزنس مینوں کی جانب سے لندن میں وزیراعظم کے معاون خصوصی و چیئرمین نیشنل ٹورازم کوآرڈینیشن بورڈ ذوالفقار عباس بخاری کے ساتھ ملاقات میں کیا گیا۔ وزیراعظم کے معاون خصوصی برائے سمندر پار پاکستانیز ذوالفقار عباس بخاری نے اس موقع پر کہا کہ سکھ کمیونٹی کی جانب سے 500 ملین پاؤنڈ عطیہ کرنے کا اعلان اس بات کی غمازی کرتا ہے کہ پی ٹی آئی حکومت اقلیتوں کے مذہبی مقامات اور مذہبی سیاحت کے فروغ کیلئے بھرپور اقدامات کر رہی ہے۔ انہوں نے بتایا کہ اس سال کے شروع میں انہوں نے برٹش سکھ فاؤنڈیشن، مختلف گوردواروں کے سربراہان اور بزنس ٹائیکونز کو وزیراعظم عمران خان کی جانب سے ملک میں مذہبی سیاحت، سکھ گوردواروں کے تعمیر و ترقی اور دیگر مذاہب کے مقامات کو ڈویلپ کرنے کی خواہش کے بارے میں آگاہ کیا تھا۔