سپیکر قومی اسمبلی میں کوشش کے باوجود لفظ سلیکٹڈ کا استعمال رکوا نہ سکے،اپوزیشن نے لفظ سلیکٹڈ کے استعمال کا نیا طریقہ نکال لیا

قومی اسمبلی میں وزیراعظم عمران خان کےلئے لفظ سلیکٹڈ کے استعمال پر پابندی کے بعد اپوزیشن نے اس لفظ کے استعمال کا نیا طریقہ نکال لیا ، بجٹ اجلاس میں کٹوتی کی تحاریک پیش کرتے ہوئے پیپلزپارٹی کے ارکان بار بار جان بوجھ کر سلیکٹڈ کا لفظ استعمال کرتے رہے اور اسپیکر کو مخاطب ہو کر کہتے رہے کہ ہم نے سلیکٹڈ کا لفظ استعمال کیا ہے جس پر اسپیکر خاموشی سے مسکراتے رہے اور سلیکٹڈ کے لفظ کو حذف نہ کیا۔ جمعرات کو قومی اسمبلی میں مختلف وزارتوں اور ڈویژنز کے مطالبات زر پر اپوزیشن نے اپنی کٹوتی کی تحاریک پیش کیں ۔ اسپیکر جب اپوزیشن کو اپنی کٹوتی کی تحاریک پیش کرنے کی اجازت دیتے تو پیپلزپارٹی کی خواتین ارکان کہتیں کہ میں نے اپنی فلاں کٹوتی کی تحریک سلیکٹ کی ہے۔