پاکستان اور چین کے سرمایہ کار مشترکہ منصوبے شروع کر کے باہمی صنعتی تعاون کو مزید فروغ دے سکتے ہیں,خسرو بختیارکی چینی بزنس اور سرمایہ کاروں کے وفد سے ملاقات

اسلام آباد: و فاقی وزیر برائے منصوبہ بندی، ترقی و اصلاحات مخدوم خسرو بختیار نے کہا ہے کہ پاکستان اور چین کے سرمایہ کار مشترکہ منصوبے شروع کر کے باہمی صنعتی تعاون کو مزید فروغ دے سکتے ہیں،حکومت چین کے تعاون سے اسپیشل اکنامک زونز کی جلد تکمیل کے لئے کوشاں ہے۔ان خیالات کا اظہار انہوں نے چینی بزنس اور سرمایہ کاروں کے وفد سے ملاقات میں کیا۔ چینی بزنس وفد نے پاکستان کے مختلف شعبوں میں پہلے مرحلے میں تقریباً ایک ارب ڈالرز کی سرمایہ کاری میں دلچسپی کا اظہارکیا ہے۔ مخدوم خسرو بختیار نے اس موقع پر کہاکہ حکومت نے بیرونی سرمایہ کاری کے فروغ کیلئے سرمایہ کار دوست پالیسیاں متعارف کرائی ہیں،اسپیشل اکنامک زونز سے روزگار کے مواقع، ٹیکنالوجی کی منتقلی اور مقامی صنعتوں کی ترقی اور اقتصادی سرگرمیوں کو فروغ ملے گا۔سی پیک اب دوسرے مرحلے میں داخل ہو رہا ہے جس میں بزنس ٹو بزنس تعاون، گوادر کی ترقی، سماجی و معاشی ترقی، صنعتی اور زرعی تعاون پر فوکس کیا جائے گا۔انہوں نے کہا پاکستان اور چین کے سرمایہ کار مشترکہ منصوبے شروع کر کے باہمی صنعتی تعاون کو مزید فروغ دے سکتے ہیں۔ موجودہ حکومت چین کے تعاون سے اسپیشل اکنامک زونز کی جلد تکمیل کے لئے کوشاں ہے۔ سپیشل اکنامک زونز سے پاکستان کی صنعتی ترقی کو نئی جہت ملے گی۔ اجلاس میں پراجیکٹ ڈائریکٹر سی پیک حسان داؤد اور وزارت کے اعلی حکام نے شرکت کی۔