لا ل تربوز کی شناخت کے آسان طریقے

پاکستان میں گرمی کی آمد کے ساتھ ہی تربوز کی مانگ میں بھی زبردست اضافہ ہوگیا ہے تاہم تربوز کا مزہ اسی وقت دوبالا ہوتا ہے جب وہ لال ہو۔ کچھ لوگ تو بازار سے کٹ لگوا کر تربوز کو چیک کر کے لے جاتے ہیں لیکن اس طرح اس سے پانی بہنا شروع ہو جاتا ہے اور وہ لاکھ احتیاط کے باوجود آپ کی گاڑی اور کپڑوں کو خراب کر سکتا ہے۔
تربوز کا باقاعدہ استعمال آپ کی جلد کو خوبصورت اور روشن بناتا ہے لیکن ان سب سے بڑھ کر اس کا ذائقہ اسی وقت بھاتا ہے جب تربوز میٹھا اور پکا ہوا ہو۔ تربوز جب پھیکا نکل آئے تو پھر مزہ کرکرا ہوجاتا ہے ۔ماہرین نے چند اصول بتائے ہیں جس میں آپ کٹ لگائے بغیر اس بات کا باآسانی اندازہ کر سکتے ہیں کہ تربوز لال ہے یا نہیں۔
چند سادہ ہدایات پر عمل کرکے آپ موسمِ گرما کے ایک بہترین پھل تربوز کی باآسانی شناخت کرسکتے ہیں۔
1: یکساں گولائی اور ہموار پھل
خیال رہے کہ تربوز ہموار اور یکساں گولائی کے ساتھ ہو اور اس پر کوئی خاص نشان، کٹ کا نشان اور کہیں سے بھنچا ہوا نہ ہو۔ ان نشانات اور غیرہموار سطح کا مطلب یہ ہوسکتا ہے کہ نمو کے دوران تربوز کو اچھی طرح سورج کی روشنی نہیں ملی ہے جس کا مطلب ہے کہ پھل مکمل طور پر پکا ہوا نہیں۔ ان نشانات کا مطلب یہ بھی ہوسکتا ہے کہ تربوز کو کاشت کے دوران پانی کی اچھی مقدار نہیں مل سکی ہے۔
2: وزن معلوم کریں
تربوز کو ہاتھ میں اٹھا کر ضرور دیکھیں اور تسلی کریں کہ اس کا وزن اس کی جسامت سے زیادہ ہونا چاہیے۔ اس کے لیے آپ عین اسی جسامت کے دوسرے تربوز سے بھی موازنہ کرسکتے ہیں۔ اب جو تربوز بھاری ہوگا وہی میٹھا اور تیار ہوگا۔ اسی اصول کو دوسرے پھلوں کے لیے بھی آزمایا جاسکتا ہے۔
3: پیلا دھبہ تلاش کریں
تربوز زمین پر رکھے ہوتے ہیں اور وہیں پکتے ہیں لیکن جو حصہ زمین کو چھوتا ہے وہ ہلکا یا بہت گہرا پیلا ہوسکتا ہے اسے فیلڈ اسپاٹ بھی کہا جاتا ہے۔ اس جگہ دھوپ نہ پہنچنے سے یہ حصہ مکمل طور پر تو سبز نہیں ہوتا لیکن ہلکا اور گہرا پیلا ضرور ہوجاتا ہے۔ اسی لیے یہ دھبہ جتنا گہرا ہوگا پھل اتنا ہی میٹھا ہوگا۔
4: رنگ کی شناخت
تربوز کی رنگت گہرے لیکن کم چمکیلی یعنی بھدی ہونی چاہیے۔ اسے میٹھے پھل کی ایک اور نشانی سمجھنا چاہیے۔
تاہم تربوز اگر کہیں سے نرم ہو تو اسے نہیں خریدنا چاہیے کیونکہ یہ تربوز زیادہ پکا ہوا ہونے کے باعث جلد خراب ہونے کااندیشہ ہوتا ہے۔
لا ل تربوز کی شناخت کے آسان طریقے