معروف اداکار جوڑی حمزہ علی عباسی اور نیمل خاور خان کے ہاں بیٹے کی پیدائش ہوئی ہے۔اداکار نے ایک ٹوئٹر پیغام میں بیٹے کی پیدائش کا اعلان کرتے ہوئے بتایا کہ انہوں نے بیٹے کا نام محمد مصطفی عباسی رکھا ہے۔ادھر نیمل نے بھی اپنے انسٹاگرام اکائونٹ پر بچے کے ہاتھ کے ساتھ اپنے ہاتھ کی تصویر شیئر کی اور بتایا کہ ان کے ہاں بیٹے کی پیدائش 30 جولائی کو ہوئی تھی۔
حمزہ علی عباسی نے ٹوئٹر پیغام میں اپنے بیٹے کے لیے نیک خواہشات کا اظہار کرتے ہوئے کہا کہ میں دعا کرتا ہوں کہ وہ اللہ کا ایک شکر گزار بندہ، اچھا، عاجز اور ایماندار انسان بنے۔ساتھ ہی انہوں نے اپنے اہلِ خانہ کے لیے بھی دعاں کی درخواست کی۔ ایک انسٹاگرام پوسٹ میں حمزہ علی عباسی نے اپنے بیٹے کی تصویر بھی مداحوں کے لیے شیئر کی۔
یاد رہے کہ حمزہ علی عباسی اور نیمل خاور خان گزشتہ برس 25 اگست کو شادی کے بندھن میں بندھے تھے اور دونوں کی جوڑی کو خوب سراہا گیا تھا۔
حمزہ علی عباسی سے شادی سے قبل نیمل خاور خان نے بھی ایک ڈرامے میں کام کیا تھا تاہم شادی کے دو روز بعد خبر آئی کہ انہوں نے اداکاری سے کناری کشی اختیار کرلیا اور اس کا سبب ان کے شوہر کو قرار دیا جارہا تھا جس پر انہوں نے ایک تفصیلی پوسٹ میں آگاہ کیا تھا کہ وہ شادی سے کافی مہینے پہلے ہی اداکاری چھوڑ چکی تھیں۔
بعدازاں گزشتہ برس 14 نومبر کو حمزہ علی عباسی نے ابھی ایک خصوصی ویڈیو جاری کر کے اداکاری سے دوری کا اعلان کردیا تھا جس کے بعد ان کے مداح یہ خبر سن کر کافی افسردہ ہوگئے تھے۔تاہم 2 مارچ کو ایک ٹوئٹر پییغام میں واضح کیا تھا کہ انہوں نے اداکاری چھوڑی نہیں البتہ کچھ عرصے کے لیے دوری اختیار کی ہے۔
اداکار نے مزید لکھا کہ ‘میں نے صرف ایک طویل بریک لیا ہے تاکہ میں اپنے دین کے لیے وقت نکال سکوں، امید ہے میں پروجیکٹس بنانے کے ساتھ ایسے پروجیکٹس میں اداکاری بھی کروں جو ان حدود کو مدنظر رکھتے ہوئے بنائے گئے ہوں جو اللہ نے ہمارے لیے طے کیں’۔
