مسلم ممالک اس سلسلے میں پہل کریں افغان وزیراعظم کا اقتصادی کانفرنس سے خطاب
کابل :افغان وزیراعظم ملا حسن آخوند کا کہنا ہے عالمی برادری طالبان حکومت کو تسلیم کرے۔
اقتصادی کانفرنس سے خطاب کرتے ہوئے انہوں نے مسلم ممالک پر خصوصی زور دیا کہ وہ تسلیم کرنے میں پہل کریں۔ انہوں نے کہا قلیل مدتی امداد حل نہیں ،مستقل بنیادوں پر مسائل حل کئے جائیں۔ انہوں نے کہا طالبان حکومت عالمی برادری کے ساتھ اقتصادی تعلقات کی خواہاں ہے۔ تمام شرائط پوری کر دیں، تسلیم کرنے کاعمل شروع ہونا چاہیے۔
کابل میں ہونے والی کانفرنس میں اقوام متحدہ سمیت 20 ممالک کے نمائندوں نے شرکت کی ۔ اس موقع پر یواین او کے نمائندہ برائے افغانستان ڈیبورا لیونز نے بھی خطاب کیا۔
قبل ازیں افغان عبوری وزیر خارجہ امیر خان متقی نے بھی دنیا کو طالبان حکومت کو تسلیم کرنے کا مطالبہ کیا تھا۔ امیر خان متقی کا کہنا تھا دنیا طالبان حکومت کو تسلیم کرے، یہ طالبان حکومت کا حق ہے۔ افغان خواتین آزاد اور بااختیار ہیں، خواتین کے حقوق بارے ایک فرمان جاری کیا ہے، خواتین کو افغانستان میں کوئی مسئلہ نہیں۔
ان کا کہنا تھا کہ ہر ملک افغانستان کو اپنی نظر سے دیکھے، افغانستان پرامن، حکومت مضبوط ہے اور دنیا کے لوگ وہاں آ سکتے ہیں۔ افغانستان میں آہستہ آہستہ تمام سفارتخانے کھل گئے ہیں، دنیا افغانستان کو اب بھی قدر کی نگاہ سے دیکھتی ہے۔
