چیئرمین سینیٹ نے سرکاری و نجی یونیورسٹیوں میں طلباء کی تعداد اور داخلے کے لئے کوٹہ کے حوالے سے سوال متعلقہ قائمہ کمیٹی کے سپرد کر دیا

اسلام آباد (8 مئی) چیئرمین سینیٹ نے سرکاری و نجی یونیورسٹیوں میں طلباء کی تعداد اور داخلے کے لئے کوٹہ کے حوالے سے سوال متعلقہ قائمہ کمیٹی کے سپرد کر دیا۔ بدھ کو ایوان بالا کے اجلاس میں اس سلسلے میں سینیٹر عثمان کاکڑ کا سوال بھی ایجنڈے میں شامل تھا۔ وفاقی وزیر پارلیمانی امور اعظم سواتی نے ایوان کو بتایا کہ ملک میں 15 انجینئرنگ یونیورسٹیاں ہیں اور یونیورسٹیوں میں کل 494 سیٹیں بلوچستان کے طلباء کے لئے مختص ہیں۔ چیئرمین نے کوٹہ کے حوالے سے ارکان کے استفسار پر سوال متعلقہ قائمہ کمیٹی کے سپرد کر دیا جو اس سلسلے میں تفصیلات کا جائزہ لے گی۔ ایوان کو بتایا گیا کہ گزشتہ 10 سال کے دوران کل 11 ہزار 991 طلباء و طالبات نے مقامی یونیورسٹیوں سے پی ایچ ڈی کی ڈگریاں حاصل کی ہیں جبکہ اس عرصہ میں غیر ملکی یونیورسٹیوں سے پی ایچ ڈی کرنے والے طلباء کی تعداد 2 ہزار 160 ہے۔