سی پیک پاکستان کے لئے گیم چینجر منصوبہ ہے۔پراجیکٹ ڈائریکٹر حسن داؤد بٹ

چین پاکستان اقتصادی راہداری (سی پیک) کے پراجیکٹ ڈائریکٹر حسن داؤد بٹ نے کہا ہے کہ سی پیک پاکستان کے لئے گیم چینجر منصوبہ ہے۔ سی پیک منصوبوں کے لئے آئندہ بجٹ میں خطیر رقم رکھی جائے گی، بنیادی ڈھانچے کے منصوبوں کی تکمیل بروقت کی جائے گی۔ایک بیان میں انہوں نے کہاکہ چین پاکستان اقتصادی راہداری منصوبہ اگلے مرحلے میں داخل ہو چکا ہے۔ اگلے مرحلے میں صنعتی تعاون، زراعت، سوشل سیکٹر سمیت مختلف منصوبوں پر کام کیا جائے گا۔ انہوں نے کہاکہ ان شعبوں میں سرمایہ کاری سے ملک کے پسماندہ علاقوں کے مکینوں کا معیار زندگی بلند ہو گا۔ انہوں نے کہاکہ سی پیک کے ذریعے ملکی معیشت میں بہتری آئے گی۔ انہوں نے کہاکہ اقتصادی اور تجارتی روابط، صنعتی تعاون اور پاکستان کے خصوصی اقتصادی زونز میں چین سرمایہ کاری کرے گا۔ انہوں نے کہاکہ سی پیک کے تحت توانائی،ٹیکنالوجی اور تعلیم کے شعبوں سمیت مختلف ترقیاتی منصوبوں میں کام کا آغاز کیا جائے گا اور رشکئی میں خصوصی اقتصادی زونز پر بھی تعمیراتی کام ہو جائے گا۔