اسلام ،خوبرو اداکارہ زینب جمیل کے دل میں بھی گھر کر گیا،شوبز کو چھوڑ کر آئندہ زندگی اسلامی تعلیمات کے مطابق گزارنے کا اعلان

اسلام آباد : پاکستان کی خوبرو ماڈل و اداکارہ زینب جمیل نے بھی شو بز کو چھوڑ کر اسلامی تعلیمات کے مطابق زندگی گزارنے کا اعلان کیا ہے۔ اس حوالے سے زینب جمیل نے فوٹو اینڈ ویڈیو شیئرنگ ایپ انسٹاگرام پر موجود اپنے آفیشل اکانٹ پر ایک خصوصی پوسٹ شیئر کی ہے۔
زینب جمیل کی جانب سے شیئر کی گئی پوسٹ میں انہوں نے بتایا کہ میں فخر سے اس بات کا اعلان کر رہی ہوں کہ میں نے اداکاری اور ماڈلنگ چھوڑ دی ہے۔
سابقہ اداکارہ و ماڈل نے اس موقع پر اللہ تعالی کا شکریہ ادا کرتے ہوئے کہا کہ الحمدللہ، اللہ پاک نے مجھے قرآن و حدیث کی تعلیم حاصل کرنے کا شرف بخشا ہے۔انہوں نے کہا کہ میں اب اپنی زندگی اسلامی تعلیمات کے مطابق بسر کرتے ہوئے دین اسلام کی زیادہ سے زیادہ تعلیم حاصل کروں گی۔
واضح رہے کہ زینب جمیل نے جیو انٹرٹینمنٹ کے متعدد ڈراموں میں کام کیا ہے جن میں سدا سکھی رہو،سسرال میری بہن کا، منچلی، مل کے بھی ہم نہ ملے اور آپ کی کنیز سمیت دیگر ڈرامے شامل ہیں۔
زینب جمیل سے قبل معروف ماڈل انعم ملک نے اسلام کی خاطر ماڈلنگ کی دنیا کو خیرباد کہنے کا اعلان کیا تھا۔انعم ملک کا کہنا تھا کہ انہوں نے ہمیشہ کے لیے ماڈلنگ کی دنیا سے کنارہ کشی اختیار کرتے ہوئے دین اسلام کے مطابق زندگی گزارنے کا فیصلہ کیا ہے۔