ریڈکراس ریڈکریسنٹ ڈے کے موقع پر فاطمہ جناح پارک میں واک ، انسانیت کی خدمت کا سفرجاری رکھا جائے گا، سردار شاہد احمد لغاری

سلام آباد:ہلالِ احمر پاکستان اور انٹرنیشنل کمیٹی آف ریڈ کراس کے اشتراک سے ریڈکراس ریڈکریسنٹ کا عالمی دِن منایا گیا۔ اِس موقع پر فاطمہ جناح پارک میں آگاہی واک ہوئی اور اِس دِن کی مناسبت سے کیک بھی کاٹا گیا۔ چیئرمین ہلالِ احمر پاکستان سردار شاہد احمد لغاری نے اپنے پیغام میں اِس عزم کا اعادہ کیا کہ ہلالِ احمر پاکستان تحریک کا اہم رکن ہونے کے ناطے اپنے سات بنیادی اصولوں کا روزِ اول سے پاسدار ہے۔ہلالِ احمر پاکستان نے ہر آزمائش میں ثابت قدمی کا مظاہرہ کیا ہے۔ ماضی میں قدرتی آفات و سانحات میں ہونے والی تباہیوں کے بعد بحالی، ریلیف اور ریسکیو میں گرانقدار کردار اِس کی ساکھ ثبوت ہے۔ حالیہ سیلاب کے بعد تمام متاثرہ علاقوں میں بلا تفریق، بلا امتیاز سیلاب متاثرین کی خدمت سے نئی تاریخ رقم کی ہے۔ آج بھی ہلالِ احمر کی ٹیمیں مستعدی سے سیلاب متاثرہ علاقوں میں مصروفِ کار ہیں۔ انسانیت کی خدمت کو فرض ِ اولین سمجھتے ہوئے ہر متاثرہ فرد کی مدد کی گئی ہے۔سردار شاہد احمد لغاری نے موومنٹ پارٹنرز، رضاکاروں اور عملہ کی جانفشانی کی تعریف کرتے ہوئے اِ س اشتراک کو قیمتی اثاثہ قرار دیا ہے۔ اِس موقع پر انٹرنیشنل فیڈریشن آف ریڈ کراس کے پاکستان میں ہیڈ آف ڈیلیگیشن پیٹر پی ہوف، انٹرنیشنل کمیٹی آف ریڈکراس کے ہیڈ آف ڈیلیگیشن نکولس، ترک ریڈکریسنٹ کے ابراہیم کارلوس، ہلال ِاحمر، نارکراس اور جرمن ریڈکراس کا عملہ اور ہلالِ احمر کے رضاکار، مختلف مکاتب فکر کی شخصیات اور سکولوں کے طلبہ و طالبات بھی موجود تھے۔سیکرٹری جنرل ہلال ِاحمر عبیداللہ خان نے ریڈکراس ریڈکریسنٹ ڈے کی مناسبت سے اپنے خطاب میں انسانیت کی خدمت کا احاطہ کیا۔ انہوں نے تمام شرکا کی شرکت پر شکریہ ادا کیا۔