دن کا مقصد فرض کی ادائیگی کے دوران جانوں کا نذرانہ پیش کرنے والے پولیس افسران کو خراج عقیدت پیش کرنا ہے
قانون کی بالادستی اور عوامی تحفظ کلیے ان قربانیوں کو ہمیشہ یاد رکھا جائے گا۔ ایف آئی اے ہیڈ کوارٹر میںڈی جی جان محمد کا خطاب
اسلام آباد(نیوزرپورٹر)فرض کی ادائیگی کے دوران اپنی جانوں کا نذرانہ پیش کرنے والے پولیس افسران کی یاد میں انٹرپول کا عالی دن آج سات مارچ کو منایا جارہا ہے .دن کا مقصد فرض کی ادائیگی کے دوران جانوں کا نذرانہ پیش کرنے والے پولیس افسران کو خراج عقیدت پیش کرنا ہے.
ایف آئی اے ہیڈ کواٹرز میں انٹرپول کے عالمی دن کے موقع پر دعائیہ تقریب کا انعقاد کیا گیا.انٹرپول ہر سال 7 مارچ کو شہداء پولیس کی یاد میں بین الاقوامی دن مناتا جاتا ہے۔ اس دن کے حوالے سے ایف آئی اے ہیڈکوارٹرز میں میں مختلف تقاریب اور سیشنز کا انعقاد کیا گیا
ڈائریکٹر جنرل ایف آئی اے جان محمد نے یادگار شہداء پر پھولوں کی چادر چڑھائی.
اس موقع پر خطاب کرتے ہوئے انہوںنے کہا 7 مارچ شہداء پولیس کی لازوال قربانیوں کو خراج تحسین پیش کرنے کا دن ہے۔ ڈی جی ایف آئی اے جان محمد نے کہا یہ ان عظیم لوگوں کا دن جنہوں نے ہمارے امن و سلامتی کی خاطر اپنی جانوں کا نذرانہ پیش کیا۔ مادر وطن کی خاطر جان نچھاور کرنے والے بہادر سپوتوں کی عظیم قربانیوں کو کبھی بھی فراموش نہیں کیا جائے گا۔ ڈی جی ایف آئی اے نے کہا آج کے دن ہم عالمی سطح پر تمام شہداء پولیس کو خراج تحسین پیش کرتے ہیں اور ان کے اہل خانہ کے ساتھ یکجہتی کا اظہار کرتے ہیں۔ آج کا دن پوری دنیا کے قانون نافذ کرنے والے اداروں کے درمیان اتحاد اور یکجہتی کا مظہر ہے.انہوںنے کہا جان کا نذرانہ پیش کرنے والے آفسران کا حوصلہ، بہادری اور فرض شناسی ہمارے لیے مشعل راہ ہے۔ قانون کی بالادستی اور عوام کے تحفظ کے لیے ان کی قربانیوں کو ہمیشہ یاد رکھا جائے گا۔
آئیں عہد کریں فرض کی بجا آوری کے دوران اپنی قیمتی جانوں کا نذرانہ پیش کرنے والے شہداء کی جرات، عظمت اور بہادری کو کبھی فراموش نہیں کریں گے۔
