جمہوریت نے اس ملک میں ڈیلیور نہیں کیا۔ فوج کو ملک کی بہتری لانے کے لیے خود آگے آنا ہوگا،جمال ناصر
نیشنل پریس کلب میں پاکستان میڈیا تھنک ٹینک کے زیر اہتمام یوم دفاع پاکستان کی مناسبت سے ہونے والی تقریب سے خطاب
اسلام آباد( سٹی رپورٹر ) پاکستان مسلم لیگ(ض) کے سربراہ اور قومی اسمبلی کے رکن محمد اعجاز الحق نے کہا ہے کہ جمہوریت’ مشاورت اور ایک دوسرے کی بات اور تحمل سے سننے اور برداشت کرنے کا نام ہے ۔انہوں نے یہ بات نیشنل پریس کلب میں پاکستان میڈیا تھنک ٹینک کے زیر اہتمام یوم دفاع پاکستان کی مناسبت سے ہونے والی ایک تقریب میں کہی۔ تقریب سے ممتاز اسلامی اسکالر قرآن اکیڈمی کے سربراہ حافظ نسیم خلیل نے وطن کا دفاع’ رحمت العالمین صلی اللہ علیہ وآلہ وسلم کی تعلیمات کی روشنی میں کے موضوع پر اظہار خیال اور سہیل انجم فاروقی نے نعت رسول ۖ پیش کی ۔
تقریب میں راولپنڈی کے معروف سیاسی کارکن افضل مرزا کی سیاسی خدمات پر روشنی ڈالی گئی اور خراج عقیدت پیش کیا گیا۔ تقریب سے سابق پارلیمانی سیکرٹری میاں انوار الحق رامے’ سابق نگران صوبائی وزیر صحت ڈاکٹر جمال ناصر’ راولپنڈی کے معروف سیاسی راہنماء ڈاکٹر فرخ اور دیگر نے بھی اظہار خیال کیا۔
محمد اعجاز الحق نے کہا کہ ممالک اور قوموں کی اصل طاقت ان کے نظریات میں ہے جو قومیںاپنے نظریات سے ہٹ جاتی ہیں انہیں نقصان ہوتا ہے اور وہ ترقی بھی نہیں کر سکتیں۔ہم نے حالیہ معرکہ حق میں خود سے دس گنا بڑے دشمن کو شکست دی ہے’ پہل گام کا واقعہ در اصل ایران اور پاکستان کو نشانہ بنانے کے لیے کیا گیا تھا ۔ بھارت نے پہل گام کے بہانے کی آڑ میں پاکستان پر حملہ کیا اور ہماری مسلح افواج نے اس کے دانٹ کھٹے کردیے’ ہماری فضائیہ کے شاہینوں نے رافیل سمیت بھارت کے سات طیارے تباہ کیے ۔انہوں نے کہا کہ پہل گام کے واقعہ کی آڑ میں بھارت جو کچھ حاصل کرنا چاہتا ہے اس میں اسے بری طرح ناکامی ہوئی ہے۔
سابق نگران صوبائی وزیر صحت ڈاکٹر جمال ناصر کا کہنا ہے جنرل ضیا الحق شہید کی سادگی کی کوئی مثال نہیں تھی۔ جنرل ضیا الحق اسلامی ممالک کے ایک عظیم رہنما تھے معرکہ حق میں ہم نے بھارت کو شکست دے کراپنی سرحدوں کو مضبوط کردیا اس ملک کی حفاظت فوج کرتی ہے۔ ملک میں جمہوریت نہیں بلکہ فوج خود نظام سنبھالے ۔انہوں نے کہا کہ جمہوریت نے اس ملک میں ڈیلیور نہیں کیا۔ فوج کو ملک کی بہتری لانے کے لیے خود آگے آنا ہوگا۔
سابق پارلیمانی سیکرٹری انوار الحق رامے ایڈوکیٹ کا کہنا تھا کہ دفاع پاکستان ہم سب کی ذمہ داری ہے ہمارے نبی نے ہمیں ہمیشہ امن اور اخوت کا درس دیا ہے۔ اللہ تعالیٰ نے ہمیں یہ ملک تحفہ کے طور پر دیا ہے۔
حافظ نسیم خلیل نے کہا کہ اپنے ملک کے لئے جہاد کرنا سب سے افضل ہے ہمارے وطن کے لئے ہمارے آباو اجداد نے بے پناہ قربانیاں دی ہیں ہماری افواج نے دس مئی کو جو معرکہ فتح کیا اس کی مثال نہیں ملتی ۔حافظ نسیم خلیل نے کہا کہ وطن کا دفاع کرنا’ اللہ کی راہ میں جہاد کرنا ہر
مسلمان پر فرض ہے ۔ہمارے سپہ سالار وطن پر قربان ہونے کو ہر وقت تیار رہتے ہیں اور ان میں وطن کی حفاظت کرتے ہوئے شہید ہوجانے کی بہت تمنا ہے۔
سیاسی راہنماء ڈاکٹر فرخ نے کہا کہ پاکستان کو مضبوط بنانے کے لئے ہمیں اپنا کردار ادا کرنا ہوگا۔ملک میں جو نظریاتی سیاست تھی جو اس وقت نہیں ہے۔ مرزا افضل جیسے سیاسی کارکن اسی نظریاتی سیاست کی وجہ سے پیدا ہوئے تھے اور انہوں نے اپنا بہترین کردار ادا کیا ہے۔ تقریب میں اسلام آباد چیمبر آف سمال ٹریڈرز انڈ سٹریز کے ممبرز کی بڑی تعداد شریک ہوئی۔
٭٭٭٭
