پاکستان ایکس سروس مین سوسائٹی ملک کی سلامتی، استحکام اور عالمی وقار کے لیے پرعزم ہے، عبدالقیوم
راولپنڈی (سٹی رپورٹر) پاکستان ایکس سروس مین سوسائٹی کے صدر، سینیٹر لیفٹینٹ جنرل(ر) عبدالقیوم (HIM) نے کہا ہے کہ حکومت کی چار نکاتی حکمتِ عملی فوجی کارروائی، قانون سازی، سفارتی اقدامات اور معاشی و سماجی انصاف کو بھرپور انداز میں جاری رہنا چاہیے تاکہ دہشت گردی کی جڑوں کا خاتمہ کیا جا سکے انہوں نے معیشت میں حالیہ بہتری کا خیرمقدم کیا جس میں زرمبادلہ ذخائر میں اضافہ، برآمدات میں بہتری اور ٹیکس اصلاحات شامل ہیں۔ تاہم جنرل قیوم نے خبردار کیا کہ امیر اور غریب کے درمیان بڑھتا ہوا فرق کم کیا جائے اور قرضوں پر انحصار گھٹایا جائے، کیونکہ اس وقت ایک چوتھائی وفاقی بجٹ قرضوں پر مبنی ہے۔ان خیالات کا اظہارا نہوں نے ایک پریس کانفرنس میںکیا. پریس کانفرنس سے خطاب کرتے ہوئے انہوںنے پاکستان کی انسدادِ دہشت گردی کی حکمت عملی، قومی معیشت، حالیہ پاکستان سعودی اسٹریٹجک دفاعی معاہدے (SMDA) اور امریکی صدر ڈونلڈ ٹرمپ کے مشرقِ وسطی سے متعلق 20 نکاتی امن منصوبے پر سوسائٹی کا موقف پیش کیا۔ جنرل عبدالقیوم نے پاکستان کی بہادر مسلح افواج، پولیس اور دیگر فورسز کو خراجِ تحسین پیش کیا جنہوں نے تحریکِ طالبان پاکستان اور دیگر بیرونی حمایت یافتہ عناصر کے عزائم ناکام بنائے۔
انہوں نے مطالبہ کیا کہ ریٹائرڈ فوجیوں کی کم از کم پنشن قومی کم از کم اجرت کے برابر ہونی چاہیے۔جنرل قیوم نے حالیہ دفاعی معاہدے کو تاریخی قرار دیتے ہوئے کہا کہ پاکستان کا 9 ارب ڈالر دفاعی بجٹ اور تجربہ کار فوج جب سعودی عرب کے 78 ارب ڈالر بجٹ اور وسائل کے ساتھ ملتے ہیں تو دونوں ممالک کے لیے شراکت داری نہایت مفید ثابت ہوگی۔انہوں نے آرمی چیف جنرل سید عاصم منیر اور عسکری قیادت کو خراج تحسین پیش کیا جن کی قیادت میں کامیاب آپریشنز سے پاکستان کا عالمی وقار بلند ہوا۔ بین الاقوامی امور پر گفتگو کرتے ہوئے جنرل قیوم نے امریکی صدر ڈونلڈ ٹرمپ کے مشرقِ وسطی امن منصوبے کو خوش آئند قرار دیا۔انہوں نے کہا کہ اس کے مثبت پہلوں میں قیدیوں کی رہائی، اسرائیلی افواج کا انخلا، جنگ بندی اور تعمیرِ نو شامل ہیں۔ تاہم انہوں نے خدشات کا ذکر بھی کیا، جن میں دوریاستی حل کی عدم شمولیت اور اسرائیل کے رویے پر شکوک شامل ہیں۔انہوں نے کہا کہ یہ منصوبہ دو ریاستی حل کی راہ ہموار کر سکتا ہے جسے دنیا کے 193 میں سے 161 ممالک پہلے ہی تسلیم کر چکے ہیں۔ لیفٹیننٹ جنرل عبدالقیوم نے کہا کہ پاکستان ایکس سروس مین سوسائٹی ملک کی سلامتی، استحکام اور عالمی وقار کے لیے پرعزم ہے۔ انہوں نے سماجی انصاف، معاشی مساوات اور امن پر مبنی عالمی موقف اپنانے کی ضرورت پر زور دیا۔اس موقع پر پیس کے چیف آرگنائزر عزیز احمد اعوان کے علاوہ سینئرنائب صدر عبدالعلیم ، سیکرٹری جنرل کموڈور ارشد خان ،ایئرمارشل(ر)پرویزنواز،میجرجنرل(ر)لیاقت علی،سابق سینیٹر میاں عتیق اورپیس کے دیگر عہدہ داران بھی موجود تھے.
