فضائی آلودگی سے متا ثرہ 184ممالک میں پاکستان چوتھے نمبر پر

عالمی ادارہ صحت (ڈبلیو ایچ او) کی رپورٹ کے مطابق فضائی آلودگی سے متا ثرہ 184ممالک میں پاکستان چوتھے نمبر پر ہے۔ فضائی آلودگی کے باعث ملک میں ہر سال 19ہزار 241 افراد موت کے منہ میں چلے جاتے ہیں اور مجموعی طور پر ایک لاکھ پاکستانیوں میں سے 33 افراد فضائی آلودگی کے باعث زندگی کی بازی ہار جاتے ہیں۔ عالمی ادارہ صحت نے خبردار کیا ہے کہ گاڑیوں، پاور پلانٹس اور فیکٹریوں سے اٹھنے والا دھواں اور مختلف کیمیکلز فضائی آلودگی میں تیزی سے اضافہ کر رہے ہیں جس کے تدارک کے لئے شجر کاری پر خصوصی توجہ دینے کی ضرورت ہے۔ ماحولیات کے شعبہ کے ماہرین نے کہا ہے کہ پاکستان میں صرف 4 فیصد رقبہ پر جنگلات پائے جاتے ہیں جبکہ جنگلات کے زیر کاشت رقبہ کی عالمی شرح 25فیصد ہے۔ انہوں نے کہا کہ درختوں کی کٹائی کے ساتھ ساتھ نئے درختوں کی شجر کاری پر خصوصی توجہ دینے کی ضرورت ہے تاکہ فضائی آلودگی کے مسائل پر قابو پایا جا سکے۔