سائوتھ ایشین گیمز میں میڈل حاصل کرنے والے تائیکوانڈو کھلاڑیوں کے اعزاز میں تقریب پیٹرن ان چیف لیفٹیننٹ جنرل جاوید اعوان نے میڈلز جیتنے والے کھلاڑیوں کو انعامات سے نوازا

اسلام آباد(سپورٹس رپورٹر) پاکستان تائیکوانڈو فیڈریشن کےپیٹرن ان چیف لیفٹیننٹ جنرل جاوید اعوان نے 13 ویں سائوتھ ایشن گیمز میں میڈلز جیتنے والے کھلاڑیوں کو انعامات سے نوازا۔ جمعہ کو ایف ایف بی ایل کے ہیڈکوارٹرز میں حوالے سے ایک تقریب منعقد ہوئی جس سے خطاب کرتے ہوئے جنرل جاوید اعوان نے کہا کہ تائیکوانڈو کے کھلاڑیوں نے سائوتھ ایشین گیمز میں بہترین کارکردگی کا مظاہرہ کیا ہے جس پر پوری فیڈریشن مبارکباد کی مستحق ہے مجھے امید ہے کہ کھلاڑی اولمپک کوالیفائنگ رائونڈ میں بھی بہترین کھیل پیش کر کے ملک کا نام روشن کرینگے انھوں نے کہا کہ تائیکوانڈو فیڈریشن نے تمام وسائل کو بروئے کار لا کر بہترین ٹیلنٹ تیار کیا ہے جو ملک کے لئے فخر کا باعث بنیں گے۔اس موقع پر گفتگو کرتے ہوئے پاکستان تائیکوانڈو فیڈریشن کے صدر کرنل وسیم نے پیٹرن ان چیف کا شکریہ ادا کرتے ہوئے انھیں یقین دلایا کہ تائیکوانڈو فیڈریشن اس بہترین کارکردگی کے تسلسل کو جاری رکھے گی اور کھلاڑی ملک کے لئے میڈلز جیتتے رہیں گے۔