راولپنڈی:چیئرپرسن پیس اینڈ کلچر آرگنائزیشن اور حریت رہنما یاسین ملک کی اہلیہ مشال ملک نے کہا ہے کہ انسانی تاریخ کے بدترین ظلم کے باوجودبھارتی افواج کشمیری عوام کے جذبہ حریت کودبانے میں ناکام ہو چکی ہیں کشمیری عوام کے صبر کی بدولت آج پوری دنیا کے سامنے نام نہادسیکولر بھارت کا اصل چہرہ بے نقاب ہو چکا ہے اور وہ دن دور نہیں جب کشمیری عوام اپنا حق آزادی حاصل کر لیں گے ۔ ان خیالات کا اظہار انہوں نے راولپنڈی آرٹس کونسل میں کشمیر ڈے کے حوالے سے منعقدہ تصویری نمائش کی افتتاحی تقریب سے خطاب کرتے ہوئے کیا۔ ـ نمائش میںکشمیری عوام پر بھارتی مظالم پر مبنی ایک سو سے زائد تاریخی اور نئی تصاویر رکھی گئی ہیںـ ڈائریکٹر راولپنڈی آرٹس کونسل وقار احمد، ناہید منظور ، مصوروں ،مقامی فنکاروں اور طلبہ نے کثیر تعداد میں شرکت کی ۔مشال ملک نے کہا کہ حریت رہنما یاسین ملک پر مقبوضہ کشمیر میں جیل کے اندر بدترین تشدد کیا جا رہا ہے اور انہیں اسی جیل میں قید کیا گیا ہے جس میں حریت پسندوں مقبول بٹ اور افضل گرو کو پھانسی دی گئی تھی ـ انہوں نے کہا کہ مظلوم کشمیری عوام کی بد دعاؤں کا نتیجہ ہے کہ شہریت کے متنازعہ قانون کی وجہ سے پورے بھارت میں آگ لگ چکی ہے اور ہر ریاست کے عوام مودی سرکار کے خلاف احتجاج کر رہے ہیں ۔انہوں نے مزید کہا کہ کشمیری عوام کشمیر کاذ کے لئے کئے گئے پاکستان کے اقدامات کو قدر کی نگاہ سے دیکھتے ہیں اور پاکستانیوں کے دل مظلوم کشمیری عوام کے ساتھ دھڑکتے ہیںـ انہوں نے کہا کہ کشمیری عوام کی قربانیاں رائیگاں نہیں جائیں گی اور بھارتی ظلم و جبر ان سے حق خود ارادیت کبھی نہیں چھین سکتاـ انہوں نے کہا کہ مقبوضہ کشمیر کی صورتحال پوری عالمی برادری کے لئے ایک امتحان ہے اور کشمیر ایشو اس نہج پر پہنچ چکا ہے کہ عالمی برادری کی خاموشی خطے کے امن کو داؤ پہ لگا سکتی ہے ۔ ڈائریکٹر راولپنڈی آرٹس کونسل وقار احمد نے اس موقع پر خطاب کرتے ہوئے کہا کہ کشمیر کاذ کی آگاہی کے لئے آرٹس کونسل نے تصویری نمائشوں اور ثقافتی پروگراموں کا انعقاد کرکے کلیدی کردار ادا کیا ہے ـ انہوں نے کہا کہ کشمیریوں پر ظلم کی موجود لہر کے خلاف پاکستانی عوام کے جذبات کی ترجمانی کے لئے پوٹھوہار کے خطہ کے فنکاروں نے اپنی صلاحیتوں کا بھر پور استعمال کیا ہے ۔
