سول ادارے تباہ حال، وزیراعظم کو ریزہ ریزہ نظام ملا، جلد بہتری کی توقع نہیں، فوادچوہدری

وفاقی وزیر سائنس و ٹیکنالوجی چوہدری فواد حسین نے کہا ہے کہ پارٹی میں کوئی اختلاف ہے نہ ہی حکومت کہیں جا رہی ہے‘سول ادارے مکمل تباہ ہیں،جس ادارے کا جائزہ لیں پتا چلے گا اقربا پروری ،سفارش اور میرٹ کے اصولوں کو بالائے طاق رکھ کر ان اداروں سے کھلواڑ کیا گیا‘ایک دو سالوں میں ان اداروں میں بہتری کی کوئی توقع نہیں۔وزیر اعظم کو ایک ریزہ ریزہ نظام ملا ہے وہ اس نظام کو کھڑا کرنیکی کوشش کر رہے ہیں‘ہمارا اتفاق رائے ہے کہ پاکستان میں اگر جمہوری نظام نے کامیاب ہونا ہے تو عمران خان کی کامیابی ضروری ہے۔اتوار کو اپنے ایک ٹویٹ میں فوادچوہدری نے کہا کہ صرف نظر دوڑائیں ہمارے ساتھ آزاد ہونے والے ممالک کہاں کھڑے ہیں ،احساس ہوگا اس عرصے میں ہم نے کیا کھویا کیا پایا۔