سی پیک کے باعث غیر ملکی سرمایہ کاری سے ملک میں نئی انڈسٹریز کا قیام عمل میں آئے گا اور ملک خوشحالی و ترقی کی راہوں پر گامزن ہوگا، رانا اخلاق احمد

فیصل آباد : آل پاکستان کاٹن پاور لومز ایسوسی ایشن کے سابق چیئر مین رانا اخلاق احمد نے کہا ہے کہ سی پیک کے باعث براہ راست غیر ملکی سرمایہ کاری میں اضافہ مضبوط معاشی پالیسیوں کا تسلسل ہے یہ سرمایہ کاری چین،ملائشیاکی جانب سے کی گئی ،غیر ملکی سرمایہ کاری سے ملک میں نئی انڈسٹریز کا قیام عمل میں آئے گا اور ملک خوشحالی و ترقی کی راہوں پر گامزن ہوگا اور خوش آئند بات ہے۔ان خیالات کااظہار انہوں نے صنعتکاروں کے ایک وفد سے ملاقات کے دوران گفتگو کرتے ہوئے کیا۔ انہوں نے کہا کہ سرمایہ کاری کیلئے بہترین6ممالک میں پاکستان کا نام شامل ہونے سے غیر ملکی سرمایہ کاری بڑھ رہی ہے جو ہمارے لئے فخرکی بات ہے چین اقتصادی راہداری منصوبہ اور منصوبہ کی راہ میں انڈسٹریل زونز کے قیام سے دنیا بھر کے سرمایہ کاروں کا رخ پاکستان کی طرف ہوگیا ہے اور دنیا بھر سے بڑی بڑی اور معروف کمپنیاں پاکستان میں سرمایہ کاری کی منصوبہ بندی کررہی ہیں ۔انہوں نے مزید کہا کہ سرمایہ کاروں کیلئے بہترین ماحول کی فراہمی سے ملک کے اندر غیر ملکی سرمایہ کاری میں مسلسل اضافہ حکومتی پالیسیوں پر غیر ملکی سرمایہ کاروں کا اعتماد کا مظہر ہے اور اس سے نہ حکومت کا صنعتی ترقی کا ویژن پورا ہوگا بلکہ پاکستان کو صنعتی لحاظ سے ایشیاء کا ٹائیگر بنانے کا خواب بھی شرمندہ تعبیر ہوگا۔