عوام کا فیصلہ تمام فیصلوں سے بڑا ہوگا‘شمائلہ چوہدری

فیصل آباد (عبدالصمد خاں) چیئر پرسن ویمن ویلفیئر کمیٹی میونسپل کارپوریشن،سٹی جنرل سیکر ٹری مسلم لیگ ن خواتین ونگ محترمہ شمائلہ چوہدری نے کہا ہے کہ عوام کا فیصلہ تمام فیصلوں سے بڑا ہوگا۔مقبول رہنما کو غیر جمہوری طریقوں سے ناکام بنانے کی کوشش کی جارہی ہے۔پاکستان کو ایٹمی اور اقتصادی قوت بنانے والوں کو نشانہ بنایا جارہا ہے۔ایسا لگ رہا ہے کہ فیصلہ پہلے سے ہی کیا جاچکا ہے۔احتساب کے نام پر انصاف کی دھجیاں اڑائی جارہی ہیں۔ انہوں نے کہا کہ عدالتیں اپنے فیصلے دیں گی لیکن پاکستان کے عوام اس صورتحال پر جلد اپنا فیصلہ دیں گے۔ 2018 میں عوام کا فیصلہ آئے گا اس فیصلے کے بعد ان سارے فیصلوں کی حیثیت ثانوی ہوجائیگی۔ احتساب کے نام پر انصاف کی دھجیاں اڑائی جارہی ہیں۔ عدالت پیشی کے لئے آنے والوں کو گرفتار کرلیا جاتا ہے۔ جب سی پیک لانے والے کو آپ اقامہ میں اس بات پر کہیں اس نے تنخواہ لینی تھی لیکن لی نہیں۔اس بات پر نااہل کردیں گے تو پھر آپ کا پوری دنیا میں کیا تاثر جائے گا۔ کچھ قوتیں جو اندرونی اور بین الاقوامی طور پر متحرک ہیں اور وہ قوتیں پاکستان کو کمزور کرنا چاہتی ہیں جس لیڈر نے پاکستان کو ایٹمی قوت بنایا اس کے بعد بھی اس کو ہائی جیکر بنالیا گیا اور گرفتار کرکے بکتر بند گاڑیوں میں گھمایا گیا اور اس بات کی سزا دی گئی۔ اس لیڈر نے جب پاکستان کو اقتصادی قوت بنانا چاہا اور سی پیک شروع کیا تو اس کو ایسی بات پر نااہل کیا کہ دنیا حیران ہے۔