پاکستان اور چین کے درمیان سیکورٹی کے معاملات پر ایک اور ایم او یو پر دستخط ہونے چاہیں

اسلام آباد(نیوزرپورٹر) پاکستان میں چین کے سفیر یاؤ جنگ نے اسلام آباد میں وفاقی وزیر داخلہ اعجاز شاہ سے اہم ملاقات کی اور سی پیک کے حوالے سے جاری منصوبوں پر تبادلہ خیال کیا۔چینی سفیر نے تجویز کیا کہ پاکستان اور چین کے درمیان سیکورٹی کے معاملات پر ایک اور ایم او یو پر دستخط ہونے چاہیں تاکہ مزید شعبوں میں تعاون کو فروغ دیا جاسکے۔ دونوں رہنماؤں کے درمیان پاک چین تعلقات کو مزید وسعت دینے پر اتفاق ہوا ہے۔ چینی سفیر نے کہا کہ پاکستان ایک پرامن ملک ہے اور حالیہ برسوں میں یہاں سیکورٹی کی صورت حال بہتر ہوئی ہے۔ انہوں نے سی پیک کے حوالے سے جاری ترقیاتی منصوبوں پر اظہار اطمینان کیا اور کہا کہ اس وقت سارا فوکس صنعتی اور سماجی ترقی پر مرکوز ہے۔چینی سفیر نے لاہور میں ہونے والے بم دھماکے کی شدید مذمت کیاور چینی حکومت کی جانب سے اس واقعہ میں جاں بحق ہونے والوں کے لواحقین سے اظہار ہمدردی کیا۔ وزیرداخلہ نے کہا کہ پاکستان میں سیاحتی سرمایہ کاری کے وسیع مواقع موجود ہیں۔ نئی ویزا رجیم سے پاکستان دنیا بھر کے لئے کھلولے گئے 175 ممالک میں شامل ہوگیا ہے۔