سی پیک منصوبہ نہ صرف بلوچستان بلکہ پورے ملک کے لئے ترقی و خوشحالی کی نوید ثابت ہوگا

اسلام آباد: چین پاکستان اقتصادی راہداری (سی پیک) منصوبے کے تحت بلوچستان میں خوشحالی کے ایک نئے دور کا آغاز ہوگا۔ سی پیک اتھارٹی کے حکام کے مطابق رواں مالی سال کے دوران سی پیک کے تحت بلوچستان میں ترقیاتی کاموں کے لئے خطیر رقم مختص کی گئی ہے۔ سی پیک کے بنیادی منصوبوں میں سے 40 فیصد بلوچستان میں مکمل کئے جا رہے ہیں۔ حکام نے سی پیک منصوبہ کو کامیابی کی راہ پر گامزن کرنے کے عزم کا اظہار کرتے ہوئے کہا ہے کہ اس منصوبہ کی تکمیل کو ہر حال میں یقینی بنایا جائے گا۔ انہوں نے کہا کہ سی پیک منصوبہ کے تحت بلوچستان کی تقدیر بدلنے کے حوالے سے اٹھائے گئے چین کے اقدامات خصوصاّ توانائی کے شعبے پر خاص توجہ دینے کے حوالے سے کاوشوں کو سنہرے الفاظ میں سراہا جائے گا۔ سی پیک منصوبہ نہ صرف بلوچستان بلکہ پورے ملک کے لئے ترقی و خوشحالی کی نوید ثابت ہوگا۔